طيييط ,, طييييط ,, تربت تيييت <<< شربكة ببوق السيارة
بعد جميع عمليات الإزعاج السابقة ,, والتي كانت سبب في إفاقتي من سباتي ,, قررت النهوض ورؤية الشخص المتسبب في جميع عمليات الإزعاج تلك .
غسلت محياي ,, ولبست ثوبي ,, وخرجت للشارع بحثاُ عن الشخص المتسبب في جميع ذلك الإزعاج ,, فلم أستغرب عندما علمت بأنه صديقي حطاطه ,, والذي فتح نافذة سيارته وقال :
حطاطه : بدري يا ......... ,, توك تطلع ,, بعد ما طلع كل أهل حارتكم من بيوتهم وعطوني نظرات الاستحقار ,, يالله تعال أ بيك في موضوع مهم .
ذهبت ببطء قاصداُ الركوب في سيارة حطاطه وأنا أردد في داخلي (( اللهم أني لا أسألك رد القضاء ولكن أسألك اللطف فيه ,, والا هذا الآدمي كيف صار خويي ))
بعد ركوبي بثواني لم يمهلني حطاطة أي فرصة لسؤاله عن أحواله وعن آخر مستجداته ,, فباغتني بقوله
حطاطه : يا ........ خويك حطاطه محتاج نصيحتك ,, وأعذرني لأني جيتك بالوقت هذا لأن الموضوع ما يحتمل تأخير .
كان ردي : أكيد ما يحتمل تأخير يا حطاطة وألا وش اللي يخليك تنسى تلبس ثوبك غير أهمية الموضوع اللي جايني عشانه ؟؟
حطاطه : لا أنا ما نسيت ألبس ثوبي ,, ولكني أرتاح باللبس هذا ؟؟
انا.... : من جدك يا حطاطه مرتاح بمنظرك كذا ,, جايني لابس سروال وفانيلة ,, ما ألوم البنات يوم يستملوننا ويعايروننا بالسروال والفانيلة
حطاطة : آآآه من البنات بس يا ........ ,, والله ياما تحت السواهي دواهي ,, وزوجتي هي السبب اللي خلاني أجيك الحين .
انا : عسى ما خلاف يا حطاطه ,, ما صار لك ثلاث شهور متزوج ,, أمداك تختلف مع زوجتك ؟؟
حطاطه (( << ولع ألسيجاره وبدا ينفث سمومها في جميع أرجاء السيارة )) : تخيل يا .... اكتشفت أن زوجتي تدخن ؟؟
انا : طيب يا حطاطة أول شيء ياليت ما تنفخ دخانك بوجهي ,, ثاني شيء وش فيها يا حطاطه لو كانت تدخن ,, هذا أنت تدخن
حطاطه (( أتضح أن العصبية بدأت تتملكه )) : هي تقول أنها صارت تدخن لأنها ما قدرت تخليني أترك الدخان ,, ولأنها تبي تتعود على ريحة الدخان عشان ما تصير تتضايق منه ,, ولكنها نست أني أنا رجال وهي حرمه ,, وعيب عندنا الحرمه تدخن ,, والله يستر منها ,, اليوم تدخن ,, وبكره تعسل ,, وبعد كم يوم القاها عازمه شباب في بيتي
انا : لا لا تقول كذا يا حطاطة ,, حرمتك بنت ناس ,, وإخوانها وأبوها والله والنعم شروا من يقرا << صعب أقول شروا حطاطة لأنه من جنبها ,, وهي يا حطاطه يمكن حبتك وتبي تقلدك بأي شيء .
حطاطة : تستظرف مع وجهك ,, هي لو تحبني ما كان تقول أنها تندمت أنها تزوجتني ,, وما كانت تعايرني بكرشتي وتقول لي هاااه صرت بأي شهر
لم أستطع تمالك نفسي وانفجرت ضاحكاُ وقلت لحطاطة : ياخي والله أنها صادقه ,, كرشتك كل يوم تكبر وكأنك حامل ,, ياخي حاول تسوي كنترول لجسمك .
حطاطة : شوف يا ........ ,, الرجال ما يعيبه إلا جيبه ,, والحمدلله أنا ماني مقصر معاها بشيء ,, وبيني وبينك أنا بديت أتندم لأني استعجلت بالزواج ,, لأني كنت أفكر أن الزواج بس فراش ورومانسية ,, ما توقعت أن الزواج فيه مسؤولية ,, عشان كذا أفكر أطلق بنت الناس وأرجع أعيش عزوبي أحسن لي .
انا : تبي نصيحتي يا حطاطة ؟؟
حطاطة : أكيد راح تقول لي لا تطلق ,, وأن أبغض الحلال عند الله الطلاق وهالسوالف ,, ولكن أنا ما راح أسمع كلام أحد ,, وما راح أطلق ,, وراح أعلق الخايسه هذي حتى ترجع لي كل الفلوس اللي دفعتها لها من مهر وغيره ,, مو هي تقول أنها تبي الطلاق ,, خلاص خلها تدفع لي كل قرش دفعته عشانها .
انا : شوف يا حطاطة ,, أبي أسألك وأبي أجابات صادقه منك ,, أنت قادر تترك الدخان ,, وقادر تهتم في جسمك ونظافتك الشخصية ,, وقادر تحتوي الأنسانه اللي عايشه معاك ؟؟
حطاطة : شوف يا ..... ,, مستحيل أترك الدخان ,, ولا تبيني أتركه عشان مين ؟؟ عشان الخايسه ذي ,, والله ما تركته عشانها وأنا اللي ما تركته عشان أبوي وأمي ,, وبالنسبة لجسمي ومظهري وصفاتي ياخي عاجبتني ,, وياليت تهتم في نفسك .
انا : دام السالفة كذا ,, أنصحك تطلق يا حطاطة وتعتق بنت الناس ,, والله أن لقب مطلقة أشرف وأحسن لها من لقب حرم حطاطه .
حطاطه : افااا يا ......... ,, أشوفك قلبت علي ,, أنت على أي أساس قلت هالكلام ,, والا مسوي أنك عضو من لجنة حقوق الأنسان
انا : أول شي يا حطاطة أسمها لجنة حقوق المرأة مو لجنة حقوق الأنسان ,, ثاني شيء يا حطاطة أنا قلت لك لا تنفث سموم دخانك بوجهي ,, ثالث شيء يا حطاطة خلني أعلمك الأسباب اللي خلتني أقول لك طلقها ,, ولكن بدون ما تقاطعني رجاء
حطاطة : هذي الزقارة وطفيتها ,, يالله تفضل يا أستاذ وتفلفس علينا
يا حطاطة أبوي كان يدخن لمدة تجاوزت 20 سنه ,, تدري كيف ترك الدخان ؟؟ بقول لك كيف تركه ,, أبوي ترك الدخان لأنه في أحد المرات لقى أخوي اللي أكبر مني كان يدخن ورى البيت وعمر أخوي وقتها ما يتجاوز 10 سنوات ,, بعد عملية العقاب لأخوي من قبل الوالد ,, سئل أبوي أخوي عن السبب اللي خلاه يدخن وهو بالسن هذي ,, قال أخوي (( أبي أصير مثلك رجال ))
من بعدها حرم أبوي التدخين والحمدلله الحين صار له أكثر من 20 سنه ما دخن وأزيدك من الشعر بيت صار ما يحب ولا يستصيغ ريحة الدخان .
الشاهد (( ما هو عيب أنك تترك الدخان عشان حرمتك ,, أو على الأقل لا تزعل لو شفتها تدخن مثلك ))
ثاني شيء تذكر يا حطاطة لما خطبوا لك أهلك بنت عمك ورفضتها لأن وزنها زايد ,, أنت الحين وزنك كل يوم يزيد ,, وزوجتك الله يعطيها العافية تحاول تساعدك بنقص الوزن وتسوي لك سلطات وأكلات صحية ولكنك تضحك عليها وتروح تأكل بمطاعم البخاري والبروستد من ورى ظهرها .
الشاهد (( ياليت يا حطاطة تناظر نفسك قبل لا تعيب على الناس ))
ثالث شيء يا حطاطه أنت تغازل وتخون زوجتك ,, ولما أنا عاتبتك قبل اسبوعين قلت لي أنك تدور الحنان اللي ما لقيته عند زوجتك ,, يا حطاطه لنفرض أن زوجتك مقصره في حقك مع أني متأكد أن العكس هو اللي حاصل ,, لو كانت مقصرة في حقك ياخي نبهها وعلمها وش اللي يعيبها عشان تعدله عشانك ,, أما تخونها هذا اللي لا يرضاه العقل ولا المنطق ولا الدين .
الشاهد (( لو كانت مقصره في حقك ونبهتها و ما شفت منها أي تجاوب ,, ياخي الشرع محلل لك أربع ,, يعني تزوج الثانية على سنة الله ورسوله ,, وأترك عنك الخربطه مع البنات ))
رابع شيء بذمتك يا حطاطه متى اخر مره فرشيت فيها أسنانك ؟؟ أكيد أيام حرب الخليج لما كانوا يوزعون علينا فرشاة أسنان ومعجون مجاناُ في المدارس ,, ,, أنا لو أني زوجتك وشفتك تضحك بسنونك النصراويه هذي ولابس سروال وفانيلة وجالس تدخن في صالة البيت ,, ما راح أطلب الطلاق وبس ,, الا راح أطالب بمحاكمتك
الشاهد (( ياخي ترى النظافه من الإيمان ))
خامس شيء يا حطاطة ترى الزواج مو بس فراش ورومانسية مثل ما تفكر أنت وأغلب الشباب ,, الزواج مسؤولية ,, يعني قبل لا تفكر في بنات الناس أنها راح تكون الأنسانه اللي تنام معاها وتاخذ حاجتك الجنسيه منها ,, ياخي فكر كيف راح تبني مستقبلك معاها ,, فكر كيف راح تربي عيالك معاها أذا رزقكم الله بعيال ,, فكر تساعدها في التخلص من السلبيات اللي عندها ,, فكر كيف تحتويها وتكون لها زوج وأب وأخ وصديق وكل شيء .
الشاهد (( لو كان الغرض من الزواج مثل ما تفكر ,, كان ما فيه فرق بين بيننا وبين الحيوانات ))
يا حطاطة أعتق بنت الناس ,, لأنها ما تزوجتك وتركت أهلها الا عشان تعيش حياة كريمة أفضل من عيشتها مع أهلها ,, ودامها مالقت عندك الا كل شيء ممكن يكون سبب في ضياعها ونزولها لمستوى غير جيد ,, الطلاق يكون حل جيد وممتاز .
قبل مدة يا حطاطة كنت أفكر في احد أقربائي اللي خطب أصغر شقيقاتي ,, وكنت أحمد ربي أن ربي رزقنا بهذا الشخص من دون سائر بقية الشباب ,, لأنه أنسان عكسك تماماُ ياحطاطة ,, وللأسف قليل جداُ جداُ جداُ اللي هم في نفس تفكيره ووعيه ورقي مبادئه .
وصدقني يا حطاطة لو عندي بنت وجيت أنت والا أحد من أمثالك ,, راح أفضل أزوجها أي هندي أو يمني أو بنغلاديشي محترم ويخاف الله ,, والا أنها تجلس عندي معززه مكرمه ,, راح أخليها تجلس عانس ,, ولا تنهي حياتها ومستقبلها بالارتباط مع واحد من أمثالك .
الله يسامح صديقنا عادل اللي وافق يزوجك أخته وهو يعرفك زين ,, لأني بديت أحس أنه ينتقم من أخته لما زوجها شخص مثلك .
أنتهى نقاشي مع حطاطه
وسوف أبدي وأنهي حديثي معاكم يا أعزائي الذكور بهذه الكلمات :
يا عزيزي القارئ تأكد بأنك سوف تحكم على شقيقتك أو أبنتك بالإعدام المبكر ,, عندما تزوجها شخص بدون أخلاق وبدون طموح وبدون تربية <<< بأختصار شخص مثل حطاطه .
هذة هي نهاية القصة
منتديات مملكة الفرات 
منتديات مملكة الفرات 
