اعلان حدادي للعشق ما عود

اريد اعلن حداد وللعشك ماعود
واريد انساك ونسه البينك وبينه

وشك دفتر غرامك خاطر انه انساك
ودير الوجه عنك من تلاكيني....

مااريدك بعد لو انت روحي تصير
مااريدك لون من موتي تحييني

ملح بعيوني احطن وانسه حتى النوم
اخاف بالمنام اطيوفك تجيني......

اذا شافتك عيني وفرحت بملكاك
والله اتبره منهه وهاي مو عيني

واذا كالولي حبك يسري بالشريان
ثق بالله اكطع كل شرايني

واذا صاير شمس انه ابقه دوم بليل
وماريد الضوة وبلظلمه خليني

تذكرمن لكيتك والعطش واليك
وكلتلي امعود اترجاك روييني

عصرت اجفون عيني و وشلت من دموع
وشربتك بديه وانت تدرييني

ومن مرني العطش صرت انت جربة ماي
كصدتك معتني ومديت جفيني

وانتة بكل وكاحة وكل صلافة عين
درت بجفوفي سم وردت تنهيني

تذب نفطك عليه وانه بيه النار
وتتحمه اعله ناري و ماتطفيني

وصرت محبس بديك وكمت بيه تسوم
ساعة تبيع بيه وساعة تشريني

اظل خصمك وفضحك حتى من اتموت
على كبرك اخطن بايك اسنيني